સૌ મથે છે પામવા એને સ્તવનમાં આમ તો

સૌ મથે છે પામવા એને સ્તવનમાં આમ તો!
ગૂંજે કાયમ નામ એનું છે પવનમાં આમ તો !
હોમવાના છે બધા અવગુણ ખરેખર એમાં, પણ
હોમે સૌ દ્રવ્યો બીજાં જો કે હવનમાં આમ તો !
માનવીમાં એ ભળી એવાં ગયાં છે આજે સૌ,
પ્રાણીઓ રહેતાં હતાં હિંસક હા, વનમાં આમ તો !
દર્દ આ આવી ગયું ક્યાંથી, ના એ પૂછો તમે!
માંડ એને હું છુપાવું છું કવનમાં આમ તો!
કોઈને પોતાનું તું માને એ તારી ભૂલ છે,
હોય છે ક્યાં કોઈ, કોઈનું જીવનમાં આમ તો!
-હેમંત મદ્રાસી