ફૂલ ઝરંતો હાથ લઈને, ઝાકળ જેવી જાત લઈને,સૂરજની એક વાત લઈને મારે તમને મળવું છે !સાંજ ઢળ્યા-ની ‘હાશ’ લઈને, ઝલમલતો અજવાસ લઈને,\nકોરાં સપના સાત લઈને મારે તમને મળવું છે.\n\nતમે કદાચિત ભૂલી ગયા છો, કદી આપણે કાગળ ઉપર,\nચિતર્યું’તું જળ ખળખળ વહેતું, ને તરતી મૂકી’તી હોડી;\nસ્થિર ઊભેલી તે હોડીને તરતી કરવા, સરસર સરવા,\nઝરમર ઝરમર સાદ લઈને મારે તમને મળવું છે.\n\nખોજ તમારી કરતાં કરતાં થાક્યો છું હું, પાક્યો છું હું,\nપગમાંથી પગલું થઈ જઈને વિખરાયો કે વ્યાપ્યો છું હું;\nજ્યાં અટવાયો જ્યાં રઘવાયો, તે સઘળા મારગ ને\nમારગનો એ સઘળો થાક લઈને મારે તમને મળવું છે.\n\nક્યારેક તો ‘હું’ને છોડી દો, ભીતરની ભીંતો તોડી દો,\nબંધ કમાડ જરા ખોલી દો, એકવાર તો ‘હા’ બોલી દો;\n‘હા’ બોલો તો હાથમાં થોડા ચાંદલીયા ને તારલીયાની\nઝગમગતી સોગાત લઈને મારે તમને મળવું છે.
-રિષભ મહેતા
No comments:
Post a Comment