આ  શબ્દમાં  પોટાશ  છે સંભાળજો
કેવળ  અહીં  ખારાશ   છે સંભાળજો
મારી  ગઝલ કંઇ  વેવલાવેડા નથી
આંખો  તણી  લાલાશ  છે  સંભાળજો
                       સાલસ

સાલસ

શ્વાસનો  પર્યાય શોધી લાવ તું
કાં પછી આ જિંદગીમાં આવ તું
મેં  ગુમાવી  તક, નહીં  આવે હવે
ઓ સમય! આજે લઈ લે દાવ તું
        
આ  જમાનાને  નહીં  આવે કદી
દોસ્ત ! ના એવું કહી શરમાવ તું

                        સાલસ

♡ Selfy ♡ - સાલસ

આજે તો
એમ થયું કે
હવાનો ફૉટો પાડું !
જોયું તો - -
રંગબેરંગી ફૂલોની સૌરભ - -
ધ્વનિતરંગ પરના ટહુકા - -
રાતે  રોપેલી ભીંનાશ - -
બધું  જ - -
આવી ગયું  ફૉટામાં  !
હવા કેટલી પારદર્શક  નઈ  ?
પછી  - -
મારી સ્વછબિ લેવા
સાવ જુઠ્ઠું હસ્યો
આપણે - -
બહારના માણસને પણ
સાચો બતાવતા નથી
તો  પછી
અંદરના
માણસની તો
વાત જ શું કરવી!
આપણે
ખરેખર ' Selfy ' છીએ નઈ  !!

-સાલસ

સાલસ

જે દિવસથી આપણે માણસ મટી ગયા
ભાવ જન્નતની હવાના પણ વધી ગયા
- સાલસ

કવિતા

કવિતા
એટલે વૃક્ષનો
લીલો સ્વભાવ !
ને - -
કવિ
એટલે
દિવાનખંડમા પડેલા
ટેબલનું વૃક્ષત્વ શોધતી
તીક્ષ્ણ આંખ  !

-સાલસ