ભાવેશ ભટ્ટ ‘મન’

જે હતા સાથે, હજી સાથે જ છે, તોય એકલવાયું તો લાગે જ છે,
જોઉં છું નારાજ થઈ જ્યારે ઉપર, એ શરમ બે આંખની રાખે જ છે,
ધ્યાન દઈને સાંભળો ભૂતકાળને, એક જણ તમને બૂમો પાડે જ છે,
હાલ મારા એને કહેતો હોઉં છું, જે બધું મારા વિશે જાણે જ છે!
- ભાવેશ ભટ્ટ ‘મન’

હૂકમ છે રમત હારવાની નથી,
અને ચાલ પણ ચાલવાની નથી.

તમારુ કહ્યુ માનવાની નથી,
ઉદાસી કશે પણ જવાની નથી.

હવે જિન્દગી તારો ચેહરો બતાવ,
અમારે તને ધારવાની નથી.

ગયા જે હજી આંખ સામે જ છે,
ખબર કોઇના આવવાની નથી.

શુકન-અપશુકન શેના, શેની વિદાય !!
નદી પહાડને પૂછવાની નથી.
-ભાવેશ ભટ્ટ ‘મન’