કેટલી લાંબી કરી તે વારતા
ટૂંકમાં હું એટલે મપાયો છું
ખાટલે કે ઢોલીયે કે બાંકડે
એક તારી યાદમાં ઘવાયો છું
બાજરો ને જાર દાણાં ઓરતી
સાવ ઝીણું કણ બની ફસાયો છું
વારતાયુ તે કીધી એ સાંભળી
તોય સઘળા ભેદમાં છવાયો છું
શબ્દ સઘળા મેં મઠાર્યા પ્રેમથી
ગીત જાણી એટલે ગવાયો છું
-હર્ષિદા દીપક
રૂમઝુમ રૂમઝુમ હેલી આવી
એવી વરસી ...
કંઇ એવી વરસી ..
કે એવી વરસી ....કે
વાંસલડી વનમાં ગજાવી
રૂમઝુમ રૂમઝુમ ........
નાનકડા છોડવાઓ બોલતાં થયા
ગાય અને વાછરડા ડોલતાં થયા
ખેતરમાં ખેડૂઓ દોડતાં થયા
ભીડેલા દ્વાર હવે ખોલતાં થયા
ઘમઘમતી ઘૂઘરિ ઘમકાવી
એવી ઘમકી ....
કંઇ એવી ઘમકી ....
કે એવી ઘમકી .... કે
ફૂલડાંથી હરખે વધાવી ......
રૂમઝુમ રૂમઝુમ .........
પાનેતર બોલ્યું રે આભલાઓ થઈ
મનમોટું ડોલ્યું રે મોરલાઓ થઈ
સરવરને ખોલ્યું રે દરિયાઓ થઈ
ઢેફાને તોલ્યું રે ત્રાજવાઓ થઈ
લટકંતી ચાલે હું ચાલી
એવી તો છલકી ....
કંઈ એવી તો છલકી ...
કે એવી તો છલકી ...કે
ભવભવની પ્રીતમાં સમાવી
રૂમઝુમ રૂમઝુમ .........
----- હર્ષિદા દીપક
ગમતીલા ગીતોમાં હરિ નામે હેલી ભરું
પીતળિયા બેડાં લઈ ચારે કોરે ઘેલી ફરું
આંગણિયે બેસીને મીઠો તડકો મનમાં ઝીલું ,
ઓલા ગગનના ગોખથી રે ગરમાવા ની પંડે ખીલુ ,
હરિ હળવે થી .....
હરિ હળવે થી આવતા રે મલકમાં વાતો કરું ....
ગમતીલા ગીતોમાં હરિ ......
આંબાની કોયલ રે કુહૂ કુહૂ કરતી ડોલે ,
ઉનાળે ટાઢકની હૈયે મારે હેલી ખોલે ,
હરિ હળવે થી ......
હરિ હળવે થી આવીયારે અમરત-કુંભ
ચરણે ધરું
ગમતીલા ગીતોમાં હરિ ......
વીજલડી ચમકીને હૈયું જાણે ઘેલું કર્યુ ,
રૂમઝૂમતી નાચતી ગઈ ટીપે ટીપે કામણ ભર્યુ ,
હરિ હળવે થી ....
હરિ હળવે થી પામીરે ગઈ અજવાળાં હું આંખે ભરું
ગમતીલા ગીતોમાં હરિ .....
- હર્ષિદા દીપક
(Painting by - Great artist Samat Bela)
સપ્તસૂરા તું જ સરગમ હોય છે
હોઠ પર જે નામ અણનમ હોય છે
સાચવી છે એમ ઈચ્છા સામટી
ફૂલ ઉપર જેમ શબનમ હોય છે
હા ! કલમ કાગળ રહે સંગાથમાં
એટલે તો શબ્દ સંગમ હોય છે
પ્રેમથી માથે ચડાવું નીરને
એ જ ગંગા, એ જ ઝમઝમ હોય છે
છે ખબર એ આવશે નઇ તે છતાં
રાહ એની તો ય હરદમ હોય છે
-------હર્ષિદા દીપક
