ગઝલ - દેવેન્દ્ર ધમલ

વિરડો શ્રધ્ધા થકી આ રેતમાં ગાળી જુઓ.
આંખ છે દરિયો ભલા ,બે આંસુઓ ખાળી જુઓ.

આ જગત પથ્થર સમું છે તે છતાં એ ઓગળે,
પ્રેમના દ્રાવણ મહીં, થોડુંક ઓગાળી જુઓ.

જડભરત જેવા જગતનું,આ અંધારું ટાળવા,
હેતથી હૈયું ભલા,ચોમેર અજવાળી જુઓ.

પ્રેમથી દિલને મનાવો ,ખુદ તણું એ માનશે,
એ પછી તો કોઇ પણના, બિંબમાં ઢાળી જુઓ.

હો પ્રકાશિત આપનું વ્યક્તિત્વ સાચે પણ જરા,
આ હ્રદયને પર વ્યથાની આગમાં બાળી જુઓ.

થઇ જશે જીવતર તમારું,રંગરંગી ઓ 'ધમલ',
પ્રેમથી આ પ્રેમવાળા,પંખીને પાળી જુઓ.

              
- દેવેન્દ્ર ધમલ