'પ્રદીપ'
બુઝશે હમણાં આગ પ્રદીપ,
છેડો દીપક રાગ પ્રદીપ.
હૈયામાં ઊંડાણ ઘણું,
આંખો દેશે તાગ પ્રદીપ.
હમણાં દીધું સ્મિત તને,
સારો છે આ લાગ પ્રદીપ!
સમજ્યો ના? હું 'શું' બોલ્યો?
કાનમાં પડ્યાં ઢાગ પ્રદીપ?
સામે આવ્યો સિંહ ભલે,
કાયર થૈ ના ભાગ પ્રદીપ.
માગે છે શું એક ગુલાબ,
આપું દિલનો બાગ પ્રદીપ!
કો'ક અતિથિ આવશે હમણાં,
નેવે બોલે કાગ પ્રદીપ!
ખૂટીં ગઈ દરિયાવદિલી?
નદીઓ જોડે માગ પ્રદીપ.
અજવાળી દે ફૂંક દઈ,
તું છે એવો નાગ પ્રદીપ.
તશ્કર ટૂટ્યાં છે ઘરમાં!
ઉઠ, ઊભો થા, જાગ પ્રદીપ.
બુઝી ગઈ છે જ્યોત હવે,
મૂકી કાળો દાગ પ્રદીપ!
(ટૂંકી બહેરની ગઝલ)
- પ્રદીપ સમૌચા
No comments:
Post a Comment