શેહઝાદી હતી... - ખલીલ

ને પછી એવું થયું કે રાત વરસાદી હતી,
ને પછી રસ્તા માં એક પલળેલી શેહઝાદી હતી...

ને પછી એવું થયું કે બંને સપના માં મળ્યા,
એ રીતે બીજે તો ક્યાં મળવાની આઝાદી હતી...

ચંદ્ર ને પણ છત ઉપર ઉતરી જવા નું મન થયું,
ચાંદની રાતે અગાશી કેવી ઉન્માદી હતી...

હાર પેહરાવા જતા ઓચિંતી આંખ ઉઘડી ગઈ,
એ પછી સ્વપ્ના એ કીધું, રાત તકલાદી હતી.

આત્મ-હત્યા નો ગુનો દાખલ થયો દીવા ઉપર,
ને પછી જાણ્યું હવા પોતે જ ફરિયાદી હતી.

ને ખલીલ, એવું થયું, લયલા કશે પરણી ગઈ,
ને પછી બીજે દિવસ મજનૂ ની પણ શાદી હતી.
- ખલીલ