ત્રણેક વર્ષ પહેલાં લખાયેલ એક ગઝલ - જોગી જસદણવાળા

ફૂલગુલાબી શમણાં વચ્ચે ઊભેલો છું,
જીવ-જગતની ભ્રમણાં વચ્ચે ઊભેલો છું.

હા ને નાનું મફલર એવું વીંટાયું છે -
આજે-કાલે-હમણાં વચ્ચે ઊભેલો છું.

તું, હું, તે કે પેલું સાચું? કોને કહેવું ?
જગજૂની વિટમણાં વચ્ચે ઊભેલો છું.

ક્યારે, ક્યાંથી ઊડતું આવી બાંધી લેશે ?
જમરાજાના જમણાં વચ્ચે ઊભેલો છું.

ઊંઘું, જાગું, ચોળું, ચાખું, તથ્યો તાગું?
ઊગમણાં-આથમણાં વચ્ચે ઊભેલો છું.

- જોગી જસદણવાળા