લઘુકથા - પરિવર્તન -મગન 'મંગલપંથી'

'હેલ્લો...! પપ્પા....'
'બોલ ને બેટા, આમ અકળાયેલો કેમ લાગે છે ?'
'પપ્પા, મને ભૂખ લાગી છે....!’
'અરે, પણ અત્યારે તો રાત્રીના દશ થવા આવ્યા ને હજી જમ્યો નથી ?'
' પપ્પા, આજનું જમવાનું બિલકુલ ભાવે એવું નહોતું, એટલે ખાધું જ નથી. એમાંય, નાસ્તો પતી ગયો છે અને અહીં  હોસ્ટેલની નજીકમાં કોઈ દુકાન કે રેસ્ટોરન્ટ પણ નથી. હવે જમ્યા વિના આખી રાત કેમની જશે ?'

મૃગેશ કંઈક કહે એ પહેલા ફોન કટ થઇ ગયો. એવામાં જ એક બિલાડી 'મ્યાઉં મ્યાઉં' કરતી આંટાફેરા કરવા લાગી. બિલાડીથી પતિને સખત નફરત છે એ જાણતી પત્નીએ તરત જ એને હાંકી કાઢવા હડી કાઢી.

મૃગેશની નજર જતાં જ એ તાડૂક્યો,' અરે, એ બિચારી ભૂખી હશે. એને કૈંક ખાવાનું નાખ.'

પત્ની પલભર તો પતિ સામે જોઈ જ રહી. ત્યાં મૃગેશ ફરી બરાડ્યો ,' અરે, આમ બાઘાની માફક શું જોયા કરે છે ?  મારું થોબડું નથી જોયું ? ઉતાવળ રાખ નહિતર એ ભૂખી ને ભૂખી ચાલી જશે.'

યંત્રવત પત્ની રસોડા તરફ ભાગી પણ પતિમાં આવેલું આ પરિવર્તન તેની સમજથી પરે હતું.

- મગન 'મંગલપંથી'