નજર સામે જ છે

ભૂખથી ટળવળ થતા ચહેરા નજર સામે જ છે,
અન્નભંડારો ઉપર પહેરા નજર સામે જ છે.

ધુળ ખાતા આજ પણ ઊભા અમલની રાહમાં,
ચૂંટણી પૂર્વેના ઢંઢેરા નજર સામે જ છે.

કારમી ચીસો ય જ્યાં અથડાઈને પાછી ફરે,
આદમી એ કાનના બહેરા નજર સામે જ છે.

છેક છેવાડે ઊભો જણ કોઇને દેખાય ક્યાં,
માણસો કંઇ મુઠ્ઠી ઊંચેરો નજર સામે જ છે.

છે નરક જેવી અહીં કંઇ માણસોની જિંદગી,
અક્ષરો ' ભારત મહાન મેરા ' નજર સામે જ છે.

                     **** હરજીવન દાફડા