યામિની વ્યાસ

પ્રીત પરખાવી દીધી મેં રોટલીના લોટમાં
જાત ભભરાવી દીધી મેં રોટલીના લોટમાં

જો, જરા વર્તન નરમ રાખે તો તું ખીલી શકે
વાત સમજાવી દીધી મેં રોટલીના લોટમાં

આવશે હમણાં અને 'એ' પૂછશે કે "કેમ છે?"
યાદ મમળાવી દીધી મેં રોટલીના લોટમાં

એક નાની વાતમાં તો કેટલું બોલ્યા હતા !
આંખ છલકાવી  દીધી મેં રોટલીના લોટમાં

લોટ, પાણી, મોણ, 'મા'નું વ્હાલ...આ છે રેસિપી,
રીત બતલાવી દીધી મેં રોટલીના લોટમાં

ભૂખ બહુ લાગી હશે ! વરસાદ પણ છે  કેટલો !
હૂંફ સરકાવી દીધી મેં રોટલીના લોટમાં

હેડકી આવે સતત જયારે કણક બાંધું છું હું
'રાહ'  જન્માવી દીધી મેં રોટલીના લોટમાં

આમ તો છે રોજનું આ કામ 'યામિની' છતાં
સાંજ હરખાવી  દીધી મેં રોટલીના લોટમાં

યામિની વ્યાસ-