પલપલિયાં તો પાડે, તું ભરમાતો નૈં
ઈ આંસુડાં લીધાં ભાડે, ભૈ હરખાતો નૈં
સાંજ ઢળી કે જો જે કરશે કાતીલ કામા
ધીરે ધીરે બાપલિયા, ડગલાં ભરજે સામા.
ઓઘડ ! અથરો થા મા...
પતંગિયાંની પાંખ સમાણો પાલવ વીંઝે
ઉના ઉના ટપકારે મરને મોસમ ભીંઝે
જરાક ભોણ કળાણું નાંખી દેશે ધામા,
હુશિયારી, મંતર, ચોટ, મોરલી થશે નકામા,
ઓઘડ ! અથરો થા મા...
નવરંગી ઈ નાટક ખેલ શું ખરાખરીનો
પચરંગી પાખંડે કરશે બે કોડીનો,
કાયા, છાયા, માયા, અપરંપાર ઉધામા
એમાં પાર પહૂંચે તો તો જામે જામા...
ઓઘડ ! અથરો થા મા...
ઘડી બે ઘડી જડી, રૂપેરી પાઘ મસ્તકે ઘેરી
નાંખ નાંખ ખંખેરી, જબરાં ચોટયાં રજકણ ઝેરી
ખૂટલ ખટપટિયાંની સનમુખ, સાચાં સોગન ખા મા
તાર તાર ઓગાળી તારા ગાન બસુરૂં ગા મા...
ઓઘડ ! અથરો થા મા...
ઘેલસાગરો કોક ગણે કે માની લ્યે અડબંગી
છટકામાંથી છટક તુંને ટોપી મળશે સરભંગી
અડાબીડ કંટાળી કેડી જનમ જનમના દા' માં
જમા જાગરણ સમરણ જ્યોતે, સાંઈ સહજ તમ સામા...
ઓઘડ ! અથરો થા મા...
- નિરંજન રાજ્યગુરુ
No comments:
Post a Comment