અમદાવાદથી ચિત્રકાર શ્રી નલિનભાઈ સૂચકે એક સુંદર ચિત્ર મોકલ્યું છે. ચિત્રની રમાના ચહેરા પરનો નિતાંત નિજાનંદ અને પ્રાકૃતિક સૌન્દર્યમાં લીનતાનો એ ભાવ મારી રીતે એક ગીતમાં પરોવીને....મારી ગુરુવારી હાજરી પુરાવું છું. (શ્રી સૂચકસાહેબને પણ તમારો પ્રતિભાવ આપી શકો છો. +919824346320) એક છોકરી પરણીને સાસરે જાય... ઉલ્હાસપૂર્ણ નવજીવનની શરૂઆતમાં થોડાક મહિનાઓ એ અનેરા સપનામાં ખોવાયેલી હોય, આખો દિવસ માંડમાંડ પસાર કરી સાંજે સાજનની રાહ જોતી હોય અને નવી બનેલી પડોસણ સખીને તેના અનુભવો કેવા ભાવથી રજુ કરે તે ....

એક નવોઢાનું ગીત

મઘમઘતા શ્વાસોમાં ગુંજે છે ભમરાનો નાદ સખી આજ મને સાજ સજી લેવા દે (૨)

ગાંઠ મારીને પાલવને છેડલે મેં એને બાંધેલો, સખી બાંધેલો.
જમણેરા હાથે કંસાર મારી માએ પછી રાંધેલો, સખી રાંધેલો.
સાત સાત ફેરામાં સાત સાત જન્મોનો સાધ્યો સંગાથ, સખી આજ મને સાજ સજી લેવા દે.
મઘમઘતા શ્વાસોમાં ગુંજે છે ભમરાનો નાદ સખી આજ મને સાજ સજી લેવા દે.

વ્હાલપના તાંતણા છૂટ્યા રે તાતનાં ફળીયામાં, સખી ફળીયામાં
જાણીબુઝીને મારી ડૂબકી મેં તોફાની દરિયામાં, સખી દરિયામાં
ધેલી તું ગણ ભલે, રાખું છું પળપળનો રોજ્જે હિસાબ, સખી આજ મને સાજ સજી લેવા દે
મઘમઘતા શ્વાસોમાં ગુંજે છે ભમરાનો નાદ સખી આજ મને સાજ સજી લેવા દે

રાત રાત જાગીને છાતીમાં સપનાઓ વાવ્યા છે, સખી વાવ્યા છે.
છમછમતી છોકરીને નારી થવાના કોડ જાગ્યા છે, સખી જાગ્યા છે.
વહેલી પરોઢનાં આંગણામાં વાવ્યો છે છોડવો ગુલાબ, સખી આજ મને સાજ સજી લેવા દે
મઘમઘતા શ્વાસોમાં ગુંજે છે ભમરાનો નાદ સખી આજ મને સાજ સજી લેવા દે
-  મંથન ડીસાકર (સુરત) ૨૪/૦૩/૨૦૧૭

ને અહીં ગીત ગાતા ચલ અલ્બમ પણ જોઈ આવજો.