વાસંતી ગીત
અવઢવ કેરી આંટીમાં ગૂંથાય
આ અંગ મારું અથરિયું ભીંજાય.
ખાલિપાના વંટોળ વચ્ચે ઊડ્યું જાય
વાસંતી ગીતડું ચારેકોર વીંટાય.
ભરચક ઉગી કૂપળી નજરે દેખી,
પછી પાનખર થઈ ગઈ થરક થરક;
આંબા કેરી શાખે કોયલ કરતી કૂક
પાંદડે આશા જાગી મરક મરક.
પાકેલી લીંબોળી આમને તેમ ઝૂલે ને
હમચી મનડું ઝીણાં ઝોલાં ખાય.
અવઢવ કેરી આંટીમાં ગૂંથાય....
શ્વાસોની સડકોમાં પાક્યું નામ હવે તો
આંખોમાં ધૂંટાઈને તપતું ;
દરિયા ભીની ઉડ્ લ્હેરો રંગ ગુલાબી
વાવડિયું લૈ આવે સપનું.
સામટાં વાવડ આંગણિયું ખખડાવે ને
મ્હેકી ફૂલ જીણેરું ગાય.
અવઢવ કેરી આંટીમાં ગૂંથાય ....
ડૉ. ભાવેશ જેતપરિયા
.
No comments:
Post a Comment