બગીચાની સવાર - સુધીર દત્તા

ધીમે   ધીમે   ઝળહળ   ખુલે
ફુલો   પરથી ,   ઝાકળ   ખુલે

સ્મિત સભર કળીઓ ખુલતી
તાજી  તાજી  ,  કુંપળ   ખુલે

બુંદે   બુંદે   ,   ટપકે   સંગીત
પાંદડીએ  પડતુ  ,  જળ ખુલે

કિરણોના   ,   કંકુ      છંટાયા
કેસરીયાળુ   ,   અંજળ ખુલે

આળસ  મરડી , પવન ઉઠે ને
સુગંધોની   ,    સાંકળ    ખુલે

પાંપણ ખુલે  ,  પાંખડીઓની
જાણે  સપનાની ,  સળ ખુલે

ડાળી ,થડ ,પર્ણો ,પુષ્પ, લત્તા,
વેલી  ,  મંજરી  ને  ફળ  ખુલે

ના  કોઇ  દંભ કરે  , ખુલવાનો
સહજ,સીધુ ,સાદુ,સરળ ખુલે

પૂર્ણતાનો   ,    ભાવ    ભરીને
આખોયે  બાગ  ,  સકળ ખુલે
-સુધીર દત્તા