પ્રેમ રંગે આ હ્રદય રોળ્યું નથી

પ્રેમ રંગે આ હ્રદય રોળ્યું નથી,
આંસુ મારું કોઇએ તોલ્યું નથી.

રાત આખી તક ઉભીતી બારણે,
તે છતાં મેં બારણું ખોલ્યું નથી.

એમ લાગ્યું હું ગયો ખોટા ઘરે,
કોઇ પણ ત્યાં કેમ છો? બોલ્યું નથી.

છે હજી નફરત ભરેલી આ દિલે,
ફૂલ એથી સ્નેહનું કોળ્યું નથી.

કામ મારા હું કરું જાતે બધાં,
કામ બીજા પર કદી ઢોળ્યું નથી.

નામ રોશન ના કરું તો ચાલશે,
નામ પેઢીનું હજી બોળ્યું નથી.

શોધવાં મોતી કિનારે બેસતો,
ના મળે; પાણી કદી ડોળ્યું નથી.
      
-'નિરાશ' અલગોતર રતન